- Innobasquek bultzatuta eta Deustuko Unibertsitatea, Mondragon Unibertsitatea, Hetel eta Ikaslan Lanbide Heziketako zentroak eta Berritzeguneak lankide dituela, proiektuak STEM lanbideei buruzko informazio eskuragarria hobetzea du helburu, ikasle eta orientatzaileei horien ezagutza erraztuz
STEM lanbideei buruzko informazio eta orientaziorik ezak zuzenean eragiten die Bizkaiko gazteei karrera akademikoa aukeratzeko orduan, sektore horiek eskaintzen dituzten aukera profesionalen ulermena mugatuz. Erronka honi heltzeko sortu da “Galaxia” proiektua, STEM lanbideei buruzko informazio eskuragarria hobetu eta ikasle zein orientatzaileei horien ezagutza erraztea helburu duena, etorkizunera begira prestakuntza eta lan arloetako aukera berriak zabaltzearren.
Innobasque Berrikuntzaren Euskal Agentziak bultzatuta eta Deustuko Unibertsitatea, Mondragon Unibertsitatea, Hetel eta Ikaslan Lanbide Heziketako zentroak eta Berritzeguneak lankide dituela, “Galaxia” proiektua Bizkaiko Foru Aldundiak sustatutako “Bizkaia with the Talent” foru-estrategiaren barruan garatu da. Bizkaian talentua garatu, erakarri eta fidelizatzea da lurraldeko 40 erakunde baino gehiago partaide dituen ekimen honen helburu nagusia.
Mapa bisuala
Aukera profesionalen ulermena eta esplorazioa errazteko asmoz, “Galaxia” proiektuak irudikapen bisuala erabiliko du, STEM lanbideen mundua hainbat planeta, kontinente eta herrialde dituen multzo batekin alderatuz.
2023-2024 ikasturtean egindako kontzeptualizazio-fasean, autodiagnostikorako hiru tresna eta zortzi jarduera garatu ziren, eta STEM lanbideekin lotutako enpresen lankidetzaz gauzatuko dira: Velatia, Ingeteam, Arteche, CIE Automotive eta Metaleko Enpresen Bizkaiko Federazioa.
Egun, proiektua bigarren fasean sartu da, eta programa formatu pilotuan ezartzen ari da20 ikastetxetan. Gainera, “Galaxia” proiektuaren arrakasta eta hedapena bermatzeko, ebaluazio eta hobekuntzarako metodo bat finkatu da, eta honi esker, datorren ikasturtetik (25-26) aurrera, programa gainerako ikastetxeetara zabaldu ahal izango da, 2027aren amaieran sare osoa sisteman sartuz.
