- Bizkaiko Foru Aldundiak bultzatutako Bizkaia with the talent programak aukera teknologikoen ezagutza hobetu eta prestakuntza akademikoaren eta lurraldeko lan-merkatuko beharren arteko loturak sortzea du helburu
Bizkaia with the talent programak Novia Salcedo Fundazioa, Innobasque, Orkestra eta Bizkaia Talent buru dituzten lau proiektu bildu ditu, STEM diziplinekiko interesa sustatu, bokazioen orientazioa hobetu eta prestakuntza-eskaintza lurraldeko lan-merkatuaren eskaeretara egokitzeko asmoz.
Hartara, Bizkaiko Foru Aldundiak bultzatutako programa honek STEM talentua garatu, erakarri eta fidelizatzea du helburu, eta horretarako, 19 proiektu garatuko ditu lau arlo estrategikotan banatuta: ezagutzea; sentsibilizatu eta gaitzea; garatu eta lotzea; eta erakarri eta fidelizatzea. Lan-ildo hauetako lehenak diziplina teknologikoak gizarteari hurbiltzea du xede, egungo ingurunean dituzten aukerak eta garrantzia agerian utziz.
Testuinguru honetan, Innobasquek Deustuko Unibertsitatearekin, Mondragon Unibertsitatearekin, Hetel eta Ikaslan Lanbide Heziketako ikastetxeekin eta Berritzeguneekin batera koordinatutako Galaxia-Etorkizuna Argitzen proiektuak diziplina horiek bigarren hezkuntzako ikasleei hurbiltzea du helburu, emakumeen parte-hartzea sustatuko duen ikuspegi berezi baten bidez.
Era berean, Orkestra buru duen analisiak prestakuntza-eskaintzaren eta enpresek eskatutako STEM gaitasunen arteko etena aztertu du, prestakuntza lan-merkatuaren egiazko beharretara egokitzeko asmoz.
Bizkaia Talent-ek plataforma digital bat garatu du, eta big dataren zein hizkuntza naturalaren prozesamenduaren bitartez, talentuaren behatoki bihurtuko da, lurraldeko kontratazioak, enplegu-eskaintzak eta talentu-mugimenduak aztertuz, etorkizuneko beharrak aurreikusi eta enpresentzat garrantzitsua izan daitekeen informazio lortzeko.
Azkenik, Novia Salcedo Fundazioa buru duen Motivaciones de las personas jóvenes frente al trabajo (Gazteen motibazioak lanaren aurrean) azterlanak gazteak lanpostu jakin bat onartu ala baztertzera bultzatzen dituzten motibazioak ulertzea du helburu, baita enpresei zuzendutako ekintzak proposatzea ere, lan-aukerak erakargarriagoak izan daitezen.
Lau proiektu hauen bidez, Bizkaia with the talent ekimenak lurraldeko industriaren lehiakortasuna eta ekintzailetza indartu nahi ditu, bokazioen orientazio eraginkorra sustatuz, gazteak etorkizuneko behar teknologikoei aurre egiteko presta daitezen.
